Escobar: Politikanë të tjerë do të shpallen “non grata”

Gabriel Escobar, i dërguari special i presidentit Biden për Ballkanin Perëndimor ka folur rreth vendimit për ish-kryeministrin Sali Berisha.

Ai ka pohuar se do të ketë të tjerë politikanë në rajon të cilët pritet të shpallen “non grata”.
Gabriel Escobar pohoi se do të ndëshkohen me ‘non grata’ dhe sanksione ekonomike jo vetëm liderët, por edhe kompanitë që i mbështesin.

“Sanksionet zbatohen për individë dhe politikanë që duhet të jenë personalisht të përgjegjshëm. Ne i kemi këto akte të gatshme në tavolinë të shoqëruara me mjete, sanksione ekonomike që mund të vendosen kundër liderëve, por edhe ndaj atyre kompanive që i mbështesin ata”, tha ai.

Ndër të tjera theksoi se Bosnja&Hercegovina dhe shtetet e tjera të rajonit duhet t’i bashkëngjiten iniciativës së Ballkanit të Hapur.

“Unë e kuptoj hezitimin për Ballkanin e Hapur. Shtetet e Bashkuara mbështesin të gjitha nismat që integrojnë ekonomikisht rajonin, përfshirë Ballkanin e Hapur, iniciative qe aktualisht përfshin Maqedoninë e Veriut, Serbinë dhe Shqipërinë. Njerëzit e biznesit, të rinjtë, ekonomitë po zhvillohen dhe autoritetet boshnjake duhet të kuptojnë se ky është një shans dhe ata duhet të shkojnë në atë drejtim. Ne e shohim Ballkanin e Hapur si një shans dhe do të sigurojmë që kjo iniciative të jetë efektive jo për përfitime politike, por për të ngritur rajonin në nivelin e standardeve evropiane”, u shpreh ndër të tjera Escobar.