Komisioni i Ekonomisë, Braçe debat me Ibrahimajn: Fabrikat e qumështit janë në llum fiskal

Debate të forta kanë shoqëruar sot mbledhjen  e Komisionit të Ekonomisë, ku po raportonte ministrja e Financave.

Në fokus të diskutimeve u vu edhe prodhimi nga fermerët dhe faturat që priten në mënyrë abuzuese, pasi ato nuk e justifikojnë prodhimin.

Erion Braçe tha se fabrikat e qumështit janë në llum fiskal. Ai tha se kur numri i lopëve bie, fabrikat e qumështit kanë “prodhuar” më shumë, ndërsa u shpreh se nuk e di, se cila është magjia që e bën të mundur këtë gjë përveçse fatura.

Ai tha se janë prerë fatura për atë që ata kanë humbur ndërsa shtoi se personalizimi i politikës fiskale është gjëja më e rëndë që mund t’i ndodhi prodhimit.

“E kam thënë që në vitin 2018, personalizimi i politikës fiskale është gjëja më e dëmshme që mund t’i ndodhë prodhimit. Sa herë që dikush vendos veten e tij mbi atë që është parimore në politikat fiskale, ndodhin dëme kolosale. Humbja është në kurriz të fshatarit, dhe çmimi do të jetë në ulje. Ky është problemi që kemi me skemën, pse nuk e çoi skemën në ekuilibër, çfarë ju kushton. Tek pjesa e qumështit, fabrikat e qumështit janë në llum fiskal. Kur numri i lopëve bie, fabrikat e qumështit kanë prodhuar më shumë, unë nuk e di, se cila është magjia që e bën të mundur këtë gjë përveç se fatura” ,tha Braçe.

Braçe bëri 4 propozime për paketën fiskale. 

“TVSH për shitjen e banesave, mos taksim të asnjë page deri ne 40 mijë lekë, akcizë për birrën, dhe akcizë për pijet me gaz”, tha Braçe.