Këngëtarja shqiptare me famë botërore, Dua Lipa, ka qenë mbrëmjen e djeshme prezente në Këshillin Atlantik, e shoqëruar edhe nga presidentja e Kosovës, Vjosa Osmani, ku u nderua me çmimin “Artistja e shquar e vitit 2021”.
Këngëtarja e “Levitating”, teksa po përshëndeste të pranishmit, ka mbajtur një fjalim, ku fjalët e para i ka thënë në gjuhën shqipe.
“Siç themi në shqip, Mirëmbrëma!”- tha Dua Lipa.
Më pas, ylli shqiptar nuk ka harruar të përmend vendin e saj, Kosovën, duke u shprehur me krenari të madhe për kulturën, të rinjtë e po ashtu edhe për liberalizimin e vizave.
Gjatë fjalimit të saj, ajo thotë se pavarësisht se Kosova është shteti më i ri në Evropë, ai prapë do të lulëzojë emicionalisht, ekonomikisht dhe kulturalisht.
“Unë qëndroj përpara jush si një fëmijë i Kosovës, e lindur në Mbretërinë e Bashkuar dhe jam sot si mysafire e Shteteve të Bashkuara të Amerikës. Unë vij nga një vend për të cilin shumica prej jush e keni dëgjuar, por ndoshta jo në mënyrën se si do ta përshkruaj. Dua të ndaj me ju pak për Kosovën time”, ka thënë ajo. Kosova është shteti më i ri në Evropë. Kemi vetëm 13 vite në rrugëtimin e tonë të pavarësisë. Dhe si pjesë e një komuniteti të fortë ndërkombëtar, ne do të lulëzojmë emocionalisht. Ne do të lulëzojmë ekonomikisht dhe kulturalisht. Është në gjenet tona. A nuk do të ishte e përshtatshme nëse Kosova mund të zinte vendin e saj brenda atij bashkimi paqësor, të lulëzonte ekonomikisht përkrah fqinjëve tanë dhe të shëronte lëndimin e konfliktit të fundit?”- tha 26-vjeçarja.
Në Këshillin Atlantik, Dua Lipa u takua edhe me presidenten e Komisionit Evropian, Ursula von der Leyen, së cilës i kërkoi liberalizimin e vizave për Kosovën.
“Të rinjtë luftojnë për të gjetur punë dhe mundësitë e tyre pengohen nga kufizimet që e bëjnë të vështirë udhëtimin për punë ose kënaqësi. Pasi kemi përmbushur të gjitha kriteret, Komisioni Evropian në fakt ka rekomanduar liberalizimin e vizave për Kosovën për më shumë se tre vjet më parë. Pra, a mendoni se ne mund ta arrijmë atë tani?”- ka qenë pyetja me të cilën i është drejtuar kryetares së KE-së.
Rikujtojmë se Dua Lipa ka qenë me datë 9 në premierën e filmit “Zgjoi” në Washington D.C. Artistja 26-vjeçare ka mbetur e mahnitur nga ky film, i cili shtjellon historinë e trishtë të grave të Krushës. / O.B / Gijotina.com
Discussion about this post