Interi vendosi një rekord të ri të pikëve në Serinë A me fitoren e arritur në fushën e Veronës. Skuadra e trajnerit Spaleti u ngjit sërish në vendin e dytë, por gjithsesi kritikat nuk mungojnë
Fitorja ishte për historinë.
Interi ia doli në fushën e Veronës në përballjen e fundit të javës në Serinë A, një sukses me domethënie të madhe.
Jo vetëm sepse u rifitua vendi I dytë, vetëm dy pikë prapa Napolit, dhe u mbajt hapi I rivalëve të tjerë.
Më shumë se kaq, pasi nën drejtimin e trajnerit Luçiano Spaleti, skuadra milaneze ka një ndryshim të jashtëzakonshëm në krahasim me sezonin e kaluar.
Plus 15 pikë në krahasim me epokën e De Burit, me 9 gola më shumë të shënuar, dhe 6 më pak të pësuar.
Për më tepër, 29 pikët e fituara deri tani janë një rekord historik për Interin në Serinë A, që nga viti 1993 kur u vendos sistemi me tri pikë për fitoren.
Skuadra e Murinjos, që fitoi titullin dhe Championsin në 2010, u ndal në kuotën 28 pikë pas 11 ndeshjeve të para.
Gjithsesi, përveç lavdërimeve për Spaletin, kritikat nuk mungojnë.
Paraqitjet në fushë të zikaltërve nuk I përgjigjen plotësisht pikëve dhe pozicionit në renditje, ndryshe nga Napoli apo Juventusi.
Mentaliteti nuk është ende ai I një skuadre të vërtetë kampione.
Gjithsesi, Spaleti e ka nisur punën e tij dhe do të duhet kohë që Interi I madh të kthehet.
Ndoshta me ndonjë përforcim në janar, por sidomos kur futbollistët të jenë më të lidhur me njëri-tjetrin dhe ta kuptojnë plotësisht filozofinë e trajnerit të ardhur nga Roma.
