Deputeti i Partisë Demokratike Luçiano Boçi dhe deputetja demokrate Albana Vokshi dorëzojnë në Kuvend kërkesën për Komision Hetimor për çështjen McGonigal.
Deputetët e opozitës mblodhën të enjten më shumë se 35 firma të nevojshme për të ngritur një komision hetimor që do të verifikojë kontaktet dhe marrëdhëniet e kryeministrit Edi Rama me ish agjentin special të FBI-së, Charles Mcgonigal.
Sipas demokratëve Komisioni hetimor do të verifikojë edhe “nxitjen, ndikimin, porositjen, përdorimin, përfshirjen përmes premtimit dhe ofrimit të favoreve, rryshfetit apo pasurive publike ndaj agjentit special të FBI-së Charles McGonigal dhe ose agjentë të tjerë të përfshirë për përfitime politike të kryeministrit Edi Rama dhe goditjen apo dëmtimin politik të opozitës shqiptare”.
Në listën e firmëtarëve të kësaj kërkese bie në sy fakti që përveç deputetëve të PD-së, përkrahës të Berishës, kanë firmosur edhe deputetë të grupit të Alibeajt si: Gazmend Bardhi, Jorida Tabaku, Lefter Gështenja dhe Andia Ulliri. Por, ai që nuk ka firmosur është vetë kryetari i grupit parlamentar, Enkelejd Alibeaj.
Discussion about this post