Kryetari i Partisë Demokratike Lulzim Basha ka publikuar një video në rrjetet sociale nga intervista në “Neës 24”, ku thekson se nuk ka pasur besë me Sali Berishën për të mbrojtur njëri-tjetrin kur cenohen interesat personale.
“Tani sa i përket besë prerjes, që është një nga sulmet më të ulëta që është bërë në këto 2 muaj nga Sali Berisha. Nuk ka pasur kurrë një besë midis meje dhe Sali Berishës për t’i rënë me shkelm sakrificës së demokratëve nëse cenohej interesi i njërit apo i tjetrit, për të mbrojtur shpinën e njërit apo të tjetrit. Jo!” – shprehet Basha.
Ai më tej thotë se e vetmja besë që e ka lidhur me Berishën, ka qenë ajo e vlerave euroatlantike, e interesit kombëtar dhe pavarësinë e Kosovës.
“Me Sali Berishën na ka lidhur një tjetër besë nëse mund ta them këtë. Që e ka ditur ta vlerësojë edhe publikisht. Besa e vlerave euroatlantike, që na çoi dhe e çoi Shqipërinë në NATO, besa e interesit kombëtar për pavarësinë e Kosovës dhe njohjes së saj ndërkombëtare. Besa për interesat më të mira të shqiptarëve që nga heqja e vizave, tek ndërtimi i infrastrukturës moderne. Kjo ka qenë besa nëse mund të themi besë që kemi lidhur me njëri-tjetrin. Dhe jo t’i binim me shkelm sakrificës së demokratëve nëse cenoheshin interesat personale të tij apo të miat. Kjo është e vërteta! Dhe gjithçka tjetër është një spekulim i pastër për të mbrojtur hallet dhe problemet personale të Sali Berishës”- shprehet Lulzim Basha.
Discussion about this post