Ish-ministri i drejtësisë dhe tashmë analisti politik, Ylli Manjani, ka dhënë mendimin e tij në lidhje me largimin në masë të popullit nga Republika e Shqipërisë. Në një status në Facebook ai ka hedhur dritë mbi faktin se tashmë në territorin shqiptar jetojnë më pak se gjysma e popullsisë.
Artikulli i plotë i Ylli Manjanit:
“Ka të dhëna indirekte llogjike dhe të besueshme se popullsia që jeton në Shqipëri është diku te 2.1 milionë banorë. Në censusin e 2011 numëroheshin 2.8 milionë banorë. Ndërkohë shtetas shqiptarë të regjistruar në gjendjen civile janë gati 4.4 milionë banorë. Dmth, në Shqipërinë e sotme jetojnë pak më pak se gysma e popullsisë.
Ky është alarm kombëtar. Shpopullim kaq i tmerrshëm i territorit si ky nuk ka njohur asnjë komb apo shtet. Ç’kuptim ka shteti, territori i të cilit braktiset në shumicë nga banorët e tij?!
Të gjithë ikin ndërkohë politika shpopulluese çimentohet. Shqiptarët ikin nga politika në vendin e tyre. Pavarësisht definicioneve legale, ata janë emigrantë politikë, sepse politika është arsyeja e largimit. Dmth, nga ato 1 milionë shuplakat e 2013-ës ,700 000 kanë ikur nga vendi.
Ja ky është fakti flagrant që shqiptarët ikin nga politika e vendit të tyre. Në këtë realitet shkombëtarizues të krenohesh se ke bërë reforma, do të thotë ose je psikopat, ose i ligë. Ky quhet literalisht shtetshkatërrim dhe, pa asnjë lidhje me shtetformimin. Në asnjë rast ky realitet nuk quhet sukses qeverisës. As sukses politik”.
Discussion about this post