Ministrat e Mbrojtjes të NATO-s do të mbajnë një takim dy-ditor në Bruksel, i cili fillon sot, pas një mbledhjeje në Gjermani të të ashtuquajturit grupi Ramstein, i përbërë nga dhjetëra vende që kanë ofruar armë për Kievin.
Grupi Ramstein pritet të diskutojë për ndihmën e mundshme të mëtejshme ushtarake, pasi Ukraina u ka bërë thirrje aleatëve të saj të ofrojnë avionë luftarakë dhe raketa me rreze të gjatë.
Sekretari i Përgjithshëm i NATO-s, Jens Stoltenberg, tha se çështja e avionëve do të diskutohet në takimin e NATO-s, në të cilin do të marrë pjesë edhe ministri ukrainas i mbrojtjes Oleksiy Reznikov.
Stoltenberg mbështeti dje raportet e zyrtarëve lokalë ukrainas se një ofensivë e re e madhe ruse kishte filluar. Ai tha se aleanca ushtarake perëndimore nuk ka parë “asnjë shenjë” se presidenti rus Vladimir Putin do paqe.
Kievi po pret një ofensivë edhe më të gjerë që mund të ketë në shënjestër jo vetëm rajonet lindore të Donjeckut dhe Luhanskut, por edhe Harkivin në verilindje dhe rajonin e Zaporizhjës në juglindje.
Stoltenberg tha se NATO do të rrisë objektivat për grumbullimin e municioneve.
Shtetet perëndimore janë pajtuar që t’i japin Ukrainës tanke moderne, përfshirë tanket gjermane Leopard 2, por edhe artileri, makina luftarake dhe armë të tjera dhe municione.
Rusia ka thënë se nëse Kievi merr avionë luftarakë nga Perëndimi, atëherë shtetet e NATO-s do të ishin palë të përfshira “direkt” në konflikt”
Discussion about this post