Aksident në Tiranë, BMW-ja përplaset me makinën e policisë

Një aksident ka ndodhur mëngjesin e sotëm pranë urës së Vasil Shantos në Tiranë ku një BMW është përplasur me makinën e policisë. Si pasojë e përplasjes kanë mbetur të plagosur dy drejtuesit e mjeteve dhe pasagjerët. Drejtuesit të mjeteve iu është bërë testi i alkoolit dhe rezultoi se nuk kanë pirë pije alkoolike.Njoftimi i policisë:

Rreth orës 05:15, te ura e “Vasil Shantos”, janë përplasur dy automjete, konkretisht automjeti tip “Skoda” i Patrullës së Përgjithshme të Komisariatit të Policisë Nr. 2 me drejtues Inspektor B. M., 31 vjeç, dhe automjeti tip “BMW” me drejtues shtetasin N. B., 36 vjeç.

Si pasojë e përplasjes janë dëmtuar dy drejtuesit e automjeteve, si dhe pasagjerët, shtetasi G. N., 38 vjeç, që ndodhej në automjetin tip “BMW” dhe punonjësi i Patrullës së Përgjithshme Inspektor J. B., 22 vjeç, që ndodhej në automjetin tip “Skoda”.

Të dëmtuarit ndodhen në spitalin e Traumës, nën kujdesin e mjekëve, jashtë rrezikut për jetën.

Të dy drejtuesve të mjeteve, iu është bërë testi i alkoolit, dhe ka rezultuar që asnjëri prej tyre, nuk kishte konsumuar pije alkoolike.