Te Interi nuk lejohen më performancat e dobëta. Zhgënjimi për barazimin ndaj Sampdorias, dje në Appiano Gentile ishte ende prezent në mendjen e të gjithëve, nga drejtuesit e stafit teknik deri te lojtarët. Një tjetër mundësi e humbur, të paktën për tu distancuar me vendin e pestë në sprintin drejt Championsit, që mbetet objektivi kryesor i kësaj pjese të dytë të sezonit.
Vazhdimësia në Europë është gjithashtu shumë e rëndësishme. Për prestigjin e klubit, për të mbushur arkat dhe për të lejuar drejtuesit e lartë të kompanisë që të jenë në gjendje të planifikojnë një treg transferimi që i përmbush pritshmëritë e tifozëve. Dhe në këtë drejtim duhet parë prania e gjithë drejtuesve në Pinetina: jo ballë për ballë me skuadrën, por vetëm përballja tradicionale e Marottës dhe Ausilios me Simone Inzaghin, me të cilin kanë pikëpamje të njëjta.
Koncepti parësor është i qartë për të gjithë: duhet riorganizim i shpejtë sepse tani e tutje paraqitjet e këqija nuk do të tolerohen më. Nga sot e deri në fund të kampionatit, nis një mini-sezon i ri ku drejtuesit e lartë të klubit duan të shohin sërish një Inter dominues dhe të suksesshëm.
Nuk ka rëndësi nëse Napoli është larg, muajt e ardhshëm do të jetë vendimtarë në vlerësimin përfundimtar, madje edhe mundësia për të shkurtuar diferencën do të kishte peshën e saj specifike në analizën e përgjithshme. Vendi i katërt është një objektiv minimal dhe i domosdoshëm, sigurisht. Por Interi është i dyti sot dhe të paktën këtu do të donin drejtuesit ta shihnin në fund të kampionatit.
Discussion about this post