Mbrojtësi i krahut të djathtë, Mërgim Vojvoda nuk e di ende se deri kur do të zgjasë eksperienca e tij në Torino. Futbollisti i Kosovës ka kontratë me klubin “Granata” deri në verën e vitit 2024.
Duhet thënë se palët nuk kanë arritur ende një marrëveshje për vazhdimin e bashkëpunimit. Trajneri kroat i Torinos, Ivan Juric është shprehur i shqetësuar për faktin se nuk e ka ende idenë se cilët lojtarë do të ketë në dispozicion për sezonin 2023/24.
E njëri prej lojtarëve në diskutim është edhe Vojvoda, kjo bëhet me dije nga portali italian “Toronews”.
Sa i përket Mërgimit, rreth kontratës së re ishte folur edhe vitin e kaluar, ndërsa drejtuesit e Torinos kishin kontakte me përfaqësuesit e tij. Vojvoda e ka shprehur dëshirën për ta vazhduar në Olimpico Grande Torino, por marrëveshja nuk është arritur pasi palët nuk ranë dakord rreth shifrave për kontratën e re.
Dhe, në këtë sezon lojtari nuk ka paraqitje mbresëlënëse dhe ky sigurisht që është një problem. Në Kosovë shprehen se mbetet të shihet deri në verë nëse do të ketë ndonjë risi në këtë drejtim. Ndërkohë, edhe portieri i kombëtares shqiptare, Etrit Berisha ka kontratë deri në vitin 2024, por që kohëve të fundit është lënë jashtë ekipit dhe mund të largohet nga Torino në verën që vjen.
Discussion about this post