Në mbledhjen e kryesisë, e cila ka nisur sot pasdite, ka pasur një përplasje me tone të larta mes kryetarit të PD, Lulzim Basha dhe Flamur Nokës në lidhje me Elbasanin.
Basha ka hedhur akuza se Suel Çela ka marrë peng kryetarët e grup seksioneve për të firmosur dhe se Aqif Rakipi është përfshirë në procesin e mbledhjes së firmave për thirrjen e Kuvendit.
“Thoni se po e organizon Aqif Rakipi, Suel Cela, Rraja, Tom Doshi. Është shumë e rëndë kjo deklaratë. Po thoni indirekt që Sali Berisha paska lidhje me bandat. Në rast se delegatët e Elbasanit janë intimiduar nga kushdoqoftë, atëherë unë jap dorëheqje. Se çfarë bëjnë njerëzit në punë të tyre, kjo është punë e tyre” – ka thënë Flamur Noka.
Ndërkohë Basha ka thënë se Suel Çela është futur me kokë në këtë proces me porosi të Edi Ramës dhe jo të Sali Berishës.
“Tani, që Aqif Rakipi është futur me kokë në këtë proces, e ka marrë vesh gjithë Elbasani. A është futur Suel Çela? Po është futur! Dhe jam i bindur se është me porosi të Edi Ramës dhe jo të Sali Berishës. Po çfarë mund të bëjë një 20 e ca vjeçar 4 orë nën presionin e Suel Çelës përveçse të firmosë? Është turpi i kësaj partie të rrijë nën mëshirë të Suel Celës, Aqif Rakipit, Tom Doshit dhe Xhelal Rrajes. Po detyra jote Flamur është t’i thuash atyre demokratëve që të ankohen në Elbasan për Suel Çelën “Suel Çelës ia thyej brinjët këtu”, po ti 4 orë rri në Elbasan dhe ikën. E kam të pamundur në cdo qelizë të trurit tim të pranoj Sali Berishën si porositës, por ai që gjen kohën për të reaguar për cdo gjë dhe nuk gjen kohën për të reaguar për këtë, kjo nuk e nderon. Asnjë fjale për Aqif Rakipin, asnjë fjalë për Suel Çelën” – ka thënë Basha.
Discussion about this post