Tri javë më parë, ishte Granit Xhaka që sulmoi ashpër ish-klubin e tij, Baselin në Instagram.
“Duhet të keni turp!!”, kishte shkruar mesfushori i Arsenalit në drejtim të kryesisë së klubit helvet.
“CH Media” ka zbuluar se ka jo pak tension mes Taulant Xhakës, vëllait të Granitit, dhe Baselit dhe kjo mund të çojë në ndëprerjen e bashkëpunimit mes palëve. Pengesë është kontrata e 31-vjeçarit. Xhaka ka një klauzolë në kontratë që i jep të drejtën që të rinovojë marrëveshjen automatikisht deri në vitin 2025 nëse aktivizohet për një numër të caktuar ndeshjesh.
Për të ndryshuar kontratën, lojtarit shqiptar iu ofrua një marrëveshje e re që do të hynte në fuqi nga 2024 dhe e cila parashikonte që pasi të mbyllte karrierën, ish-mesfushori i kombëtares të bëhej trajner i të rinjve. Xhaka dukej fillimisht dakord, për sa kohë që do të luante deri në 2025-ën.
Sipas “Blick”, Taulant Xhaka nuk fiton 1.3 milion eurot e raportuara nga “CH Media”, por është një nga “rrogtarët” më të mëdhenj në skuadrën e Baselit. Kjo nuk përshtatet në strategjinë e kursimeve të klubit që ka probleme të ndjeshme financiare.
Sipas “CH Media”, Baseli shprehu synimin e tyre për ta kthyer klauzolën e njëanshme në një dypalëshe. Përveç Xhakës, edhe klubi zviceran do të duhej të pajtohej për vazhdimin e karrierës së lojtarit deri në vitin 2025. Në të njëjtën kohë, Xhaka mësoi se do të kishte vetëm një rol mbështetës pas sezonit aktual.
Kjo marrëveshje me siguri do të nënkuptonte se koha e Xhakës në klub do të përfundonte në vitin 2024. Gjë që Xhaka nuk e dëshiron. Dhe kjo bije ndesh me premtimin fillestar të drejtuesve të klubit se ai do të luante deri në fund të marrëveshjes. Nuk është hera e parë në epokën e Degenit që lojtarët dhe ata përreth tyre ankohen për mungesë respekti dhe ndershmërie.
Discussion about this post