Partizani bie sërish, këtë herë në “kështjellën” e Kukësit ku skuadra e Rrahman Hallaçit konfirmohet një skuadër, e cila arrin të mbrojë avantazhin e fushës së saj.
Në praninë e një numri të konsiderueshëm tifozësh “Kukësi Arena” mbështeti ekipin verilindor në një ndeshje shumë të vështirë të fituar me djersë dhe që vlen shumë për verilindorët ndërsa rikthen hijet e vjetra të problemeve të Partizani që pas fitores 3-0 me Egnatian dukej një skuadër e shëruar.
Ndeshje që nisi me golin e kapitenit Gjelbrim Taipi në minutën e 22-të dhe më pas Kukësi arriti të menaxhonte shumë mirë ndeshjen. Partizani e rriti presionin por përveç disa inkursioneve dhe topave të Hotit, nuk gjeti thellësinë për të vendosur në vështirësi serioze portierin Tafas.
Ishte Edi Basa që pati në këmbët e tij topin e golit të dytë për Kukësin teksa u gjend i vetëm përballë Rexhepit por parabola e kroatit nuk ishte kalibruar mirë. 20 minutat e fundit rrodhën mes monologut të sulmit të kuq dhe mbrojtes herokie të Kukësit që ngjitet në kuotën e 28 pikëve, e barabartë me Teutën, ndërsa Partizani mbetet përkohësisht në vendin e dytë me 3 pikë më pak se Tirana.
Në ndeshjen tjetër, Bylis u thye në shtëpi 2-3 nga Egnatia që siguron rezultatin e tretë rresht pozitiv. Rrogozhinasit kthyen në favor disavantazhin e përkohshëm pas golit të Lajthisë. Jackson, Dwamena dhe Atanda në pjesën e dytë shënuan dy gola që e zhysin Bylisin sërish në zonën e ftohtë dhe ngjisin Egnatian në kuotën e 34 pikëve që mbetet në vendin e katërt.
Discussion about this post