Kryetari i Partisë Demokratike, Sali Berisha i është përgjigjur kryeministrit Edi Rama në lidhje me deklaratën e tij se “vrasësit e 21 janarit jo vetëm enden por janë në role nga më të rëndësishmet në jetën e vendit”.
Në përfundim të protestës së 3 marsit, kur po hynte në selinë e PD, Berisha tha se Rama e ka vendin në burg për ngjarjet e 21 janarit.
Berisha tha se ka dokumenta që tregojnë se Rama i solli protestuesit “mish për top”.
“Kush i solli mish për top protestuesit? Edi Rama duhet të ishte në burg për 21 janarin, ka dokumente të pakontestueshme”, tha Berisha.
Edhe njëherë, ai nuk e ka pranuar vërtetësinë e audiopërgjimeve të reja që kanë dalë dhe akuzoi ish-drejtorin e Policisë, Ardi Veliu se është njeriu që ka bërë këtë montim.
Berisha u pyet lidhur me vulën, se a do ta lironte selinë e PD nëse gjykata do të vendoste pro kreut të Grupit Parlamentar të PD Enkelejd Alibeaj. Berisha nuk pranoi të japë një përgjigje pa dalë vendimi i gjykatës. Gjithashtu ai shtoi se protesta nuk kishte për qëllim vulën, por korrupsionin që ka goditur vendin, pas sipas tij armik kryesor i shqiptarëve është Edi Rama.
Discussion about this post