Paulo Dybala i është gëzuar pa masë fitores së skuadrës së vet Roma kundër ish-klubit të tij, Juventus, të dielën dhe nuk i ka fshehur fare ndjenjat duke festuar haptazi në Olimpico.
Roma e mundi Zonjën e Vjetër një me zero falë një goli të mrekullueshëm të mbrojtësit Gianluca Mancini për ta vazhduar luftën për në katër vendet e para të Serisë A.
Skuadra e Jose Mourinhos vuajti por ia doli të ruante avantazhin deri në fund, pasi miqtë nuk gjetën golin duke goditur shtyllën tri herë.
Pas përfundimit të ndeshjes, Dybala, i cili e nisi si titullar këtë super sfidë, iu gëzua tri pikëve duke festuar në stol bashkë me mesfushorin holandez Gini Wijnaldum.
Dhe shumë tifozë të Juventusit ishin shumë të pakënaqur që e panë ish-idhullin e tyre duke festuar kundër bardhezinjve, aq shumë saqë argjentinasi u detyrua të dalë me një shpjegim në rrjetet sociale.
Dybala iu drejtuar përkrahësve të ish-klubit të vet me një mesazh përmes Telegramit.
“E di që kjo është e vështirë për ju por është edhe për mua”, shkroi Dybala.
“Megjithatë, unë tani luaj për një klub tjetër dhe me bashkëlojtarë të tjerë, dhe më duhet t’i respektoj ata. Nuk është asnjëherë e lehtë të fitosh dhe për mua, ishte shumë e rëndësishme. Respekti nuk do të mungojë kurrë, mos e lejoni veten të mashtroheni nga rrjetet sociale”, shtoi ai.
Dybala u largua nga Juventusi në verën e vitit 2022, pasi klubi vendosi të mos i rinovonte kontratën.
Gjatë shtatë viteve të kaluara në Torino, Dybala u bë lojtari i dhjetë më frytdhënës në historinë e bardhezinjve, duke shënuar 115 gola në 293 takime.
Këtë sezon, ai ka shënuar 12 gola në 24 aktivizime për “Ulkonjën”.
Discussion about this post