Kryetarja e Bashkisë Lushnjë, Eriselda Sefa, është shembulli konkret se si drejtuesit tanë e zgjidhin qesen e fondeve vetëm për propagandën elektorale. Në shumë raste, Gijotina.com ka denoncuar se si bashkitë shpenzojnë miliona për t’u hedhur pak asfalt rrugëve që të duken bukur në fushatë zgjedhore. Me tenderin e fundit të zhvilluar nga Sefa duket tregohet qartë pse ne e quajmë asfalt elektoral.
Kryetarja ka regjistruar në fillim të këtij muaji tenderin me objekt: “Blerje materiale për shtrimin me asfalt të rrugëve në territorin e Bashkisë Lushnje”, ndarë në lote.
Për të blerë asfalt dhe bitum, Sefa do të shpenzojë 700 milionë lekë ose 6.10 milionë euro.
Me këto para, sipas ekspertëve, mund të ishin rikonstruktuar të gjithë rrugët kryesore të qytetit të Lushnjës. Por, Sefa po i shfrytëzon për asfalt që do të mbulojë sa më shumë gropa, ku janë vjedhur para.
Nga shifra e lartë shohim qartë që kemi të bëjmë me shpenzim elektoral. Ndërkohë, duke parë abuzimet e mëparshme me prokurimet, shtohen dyshimet, nëse ky asfalt do të rregullojë rrugët e amortizuara, apo do të shpërdorohen paratë. Qysh kur ka marrë ka marrë detyrën, Sefa zhvillon shpesh tenderë për rrugët, por premtimet nuk i mban.
Mashtrimet e Eriselda Sefës
Kujtojmë se në mars të vitit që lamë pas, Eriselda Sefa prezantoi projektin me vlerë 60 milionë lekë, përmes të cilit premtoi se do të investojë për sistemimin dhe asfaltimin e disa segmenteve rrugore në Lushnje. Eriselda Sefa tha në atë kohë se do të ndërhyhej për shtrimin brenda vitit në segmentet “Taulla Sinani – Esma Dervishi”, rrugën “Shpresa”, rrugën e Repartit në Zhamë Sektor, rrugën “Jakov Xoxa” dhe vazhdimin e Unazës, si dhe një ndërhyrje në infrastrukturën unazës së ish Depos së Duhanit.
Por, të paktën deri në janar të këtij viti, punimet në këto segmente nuk kanë përfunduar. Po ashtu, Sefa gjithë vitin 2020 ka nënshkruar shumë kontrata për asfalt.
Në foton e mëposhtme shohim se rikonstruksioni i segmentit rrugor “Taulla Sinani – Esma Dervishi” në këtë lagje është me shumë vonesë në raport me afatin. Theksojmë se kontrata u nënshkrua në gusht të vitit 2022 me fitues “COMPANY RIVIERA 2008 SHPK”. Lidhur me këtë, përcaktohej që punimet të përfundonin pas 2 muajsh e gjysmë, pra në nëntor 2023.
Rruga “Taulla Sinani”, foro janar 2023
Të njëjtin fat ka pësuar edhe rruga “Jakov Xoxa”, e cila ndodhet në një nga lagjet kryesore të qytetit. Tenderin për asfaltimin e kësaj rruge e fitoi kompania “SHKELQIMI 07 SHPK” në gusht të vitit 2022.
Bashkia Lushnje, në 31 Gusht 2022 njoftoi nisjen e punimeve përmes një postimi në rrjetet sociale. Afati i punimeve ishte 56 ditë kalendarike, që do të thotë se rruga duhet të kishte përfunduar në 26 Tetor. 10 milionë lekë ikën, ndërsa rruga ka mbetur në gjendje skandaloze
Rruga “Jakov Xoxa”, Dhjetor 2022
E njëjta gjë ka ndodhur edhe me segmentet e tjera, pasi deri në janar të 2023 punimet nuk kanë përfunduar në asnjë prej rrugëve. Secila prej kontratave ka shkelur afatin me të paktën 6 muaj, ndërsa nuk dihet ende sa do të zgjasin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post