Aksidentoi të miturën afgane, shoqërohet shoferja në Shëngjin

Policia lajmëron se ka identifikuar dhe ka shoqëruar një shtetase, e cila me mjet ka aksidentuar një 7-vjeçare afgane në Shëngjin.

Sipas bluve, shoferja pasi ka përplasur të miturën, është larguar nga vendngjarja, por se më vonë u identifikua.

“Shëngjin / Aksidentoi një fëmijë të mitur 7 vjeç duke u larguar menjëherë nga vendi i aksidentit, Policia identifikon dhe shoqëron drejtuesen e mjetit.

Rreth orës 16:00, në Shëngjin, në vendin e quajtur ” Te Lapidari”, nga një mjet në lëvizje i cili është larguar menjëherë nga vendi i ngjarjes, është aksidentuar shtetasja e mitur afgane A. F. 7 vjeçe, banuese e përkohshme në Shëngjin, e cila ndodhet në spital për ndihmën e nevojshme mjekësore, aktualisht jashtë rrezikut për jetën.

Falë veprimeve të shpejta hetimore, shërbimet e Policisë Rrugore kanë bërë të mundur identifikimin dhe shoqërimin në ambientet e policisë të mjetit të përfshirë në aksident, konkretisht mjeti tip “Fiat Punto” me drejtuese shtetasen L. Gj. 45 vjeçe, banuese në Shëngjin, ku po kryhen veprimet procedurale.

Gjithashtu, grupi hetimor vazhdon veprimet hetimore për zbardhjen e plotë të rrethanave të aksidentit”, thuhet në njoftimin policor.