Çekia është prekur nga një valë rekord inflacioni, që po nxitet prej rritjes së fuqishme të çmimit të energjisë. Pakënaqësia e shumë qytetarëve drejtohet kundër qeverisë dhe kundër angazhimit në Ukrainë.
Mijëra vetë demonstruan në fundjavë në sheshin e Pragës Ëenzelsplatz nën sloganin “Çekia kundër varfërisë”. Ata valëvitën flamuj dhe bënë thirrje për tërheqjen e qeverisë liberal-konservatore. Kabinetin qeverisës të kryeministrit Petr Fiala ata e akuzojnë se nuk ka ndërmarrë masa sa duhet kundër rritjes së çmimeve në vend. Demonstruesit kritikuan edhe NATO-n dhe kërkuan ndërprerjen e menjëhershme të ndihmave ushtarake për Ukrainën.
Aksioni i protestave u organizua nga partia e re jashtë parlamentit PRO. “Ne jemi mbledhur për t’u pozicionuar kundër varfërisë”, tha kryetari i saj, Jindrich Rajchl. Ai tha, se dëshiron një qeveri, e cila të “kujdeset në radhë të parë për qytetarët çek”.
Çekia prej një viti po përpaballet me një inflacion rekord, që ka të bëjë kryesisht me rritjen e çmimit të energjisë në valën e luftës në Ukrainë. Në shkurt inflacioni ishte 16,7 përqind, gati dy herë më shumë se në Gjermani (8,7 përqind).
Discussion about this post