Kreu i Këshillit Kombëtar të PD, Edi Paloka ka reaguar pas lajmit të publikuar në media, ku një gazetare e emisionit “Fix Fare” plotësoi formularin në foltoren e Sali Berishës, për të bërë të mundur thirrjen e Kuvendit Kombëtar.
Paloka thotë se për ta çuar deri në fund investigimin gazetarja do të duhej që të shkonte në zyrë për të parë nëse formulari ishte dorëzuar apo jo pranë tij, por sipas tij nuk e bënë sepse qëllimi është manipulimi i opinionit publik.
“Ajo që duket “interesante” këto kohë është se të gjitha mediat në shërbim të Ramës dhe të ashtuquajturit analistë që dihet se paguhen nga Rama, papritur janë vënë të gjithë në mbrojtje të kryetarit të PD !!! Sidoqoftë kjo është çështje e tyre. Si fillim një këshillë profesionale për gazetarët e Fiksit, meqenëse dikur kam bërë dhe gazetarin investigativ. Do duhej t’i shkonit deri në fund këtij që ju e quani investigim. Nëse pasi plotësoi formularin, gazetarja do vinte tek unë dhe siç kanë bërë gazetarë të tjerë, të kërkonte të shihte formularët. Nëse midis tyre do të gjente formularin e plotësuar nga ajo vetë, atëherë ky do ishte vërtet një “investigim” i çuar deri në fund dhe i suksesshëm, por qëllimi nuk ka qenë investigimi i së vërtetës por manipulimi i opinionit”, shkruan Paloka.
Sipas Palokës, pas fazës së parë, firmat janë dorëzuar dhe te grupi i punës në Tiranë për verifikim të dytë.
“Pas kësaj faze të parë, formularët e degëve, janë dorëzuar tek një grup pune të ngritur në Tiranë nga përfaqësuesit e firmëtarëve. Ky grup pune ka bërë jo vetëm një verifikim të dytë të faktit nëse firmëtarët janë apo jo delegatë, por ka seleksionuar dhe formularë të plotësuar në mënyrë jo të rregullt edhe kur firmëtari ka qenë delegat. Në këto raste është rikthyer formulari për tu plotësuar në mënyre korrekte”, shprehet ai.
Paloka bën sërish thirrje ndaj Bashës dhe mbështetësve të tij, që të shkojnë dhe të verifikojnë firmat e delegatëve që mbahen prej disa ditësh në zyrën e tij.
Discussion about this post