Porto-Inter, një sfidë me shumë intriga

Ndeshja e kthimit e mbrëmjes sonte mes Portos dhe Interit do të vendosë se kush do të shkojë në çerekfinale. Pas ndeshjes së parë, të përfunduar 1 me 0 në favor të zikaltërve, skuadra e Inzaghit do të ketë dy rezultate nga tre në dispozicion.

Në rast të fitores me një gol diferencë të portugezëve brenda 90 minutave, do të shkohet në kohë shtesë dhe mundësisht në penallti. Në historinë e tyre, përpara dy dueleve të këtij sezoni, Inter dhe Porto janë takuar katër herë, me të gjitha takimet që janë luajtur në vitin kalendarik 2005.

Takimi i parë mes dy ekipeve ka qënë në raundin e 1/8 të edicionit 2004-05 të Ligës së Kampionëve, me Interin që mori kualifikimin falë barazimit 1-1 në Portugali dhe fitores 3-1 në Lombardi. Disa muaj më vonë, në fazën e grupeve të sezonit pasardhës, të dyja skuadrat kanë marrë nga një fitore ndaj njëra-tjetrës.

Sfida e Dragaos do të drejtohet nga Szymon Marciniak, arbitri i finales së Kupës së Botës mes Argjentinës dhe Francës. Ai do të ndihmohet nga asistentët Sokolnicki dhe Listkiewicz, arbitri i katërt do të jetë Raczkowski. Në sallën e sistemit VAR do të jenë Kwiatkowski dhe Frankowski.

Si vjen Porto në këtë sfidë?

Porto vjen në këtë takim pas fitores në kampionat në Dragao ndaj Estorilit (3-2). Skuadra e Conceicao është e dyta, pas Benfikës dhe para Bragës. Vetëm në ndeshjen e parë në San Siro ekipi bardheblu ndërpreu një seri prej 10 suksesesh radhazi.

Porto ka fituar 4 ndeshjet e fundit në shtëpi në kupat europiane kundër skuadrave italiane duke mposhtur me radhë Roma, Juventus, Milan dhe Lazio.

Nokauti i fundit kundër një skuadre italiane ishte kundër Juventusit në shkurt 2017. Në 6 nga 7 raste Porto u eliminua nga Champions League pas humbjes në ndeshjen e parë: përjashtimi i vetëm kundër Romës në sezonin 2018-19.

Si paraqitet Inter në Dragao?

“Nerazzurrët” janë të dytët në renditjen e Serie A, por janë ende të traumatizuar nga disfata në fushën e Spezia-s, një humbje që e vendosi Simone Inzaghin në qendër të kritikave.

Interi ka fituar vetëm 1 nga 8 ndeshjet e fundit jashtë fushe në Portugali (3 barazime dhe 4 humbje).

Ky takim pritet të fillojë në orën 21:00.