Kur kanë mbetur vetëm dy muaj nga zgjedhjet e 14 majit, deputetja e Partisë Demokratike, Jorida Tabaku i kërkon SPAK-ut që të përcaktojë një Prokuror Special për të hetuar krimin zgjedhor.
Për të mos njollosur zgjedhjet thekson Tabaku, duhet vullnet politik jo në letër, jo me fjalë por me veprime konkrete.
Një tjetër shqetësim që ngriti Tabaku është edhe çështja e emigracionit masiv dhe azilkërkuesve. Sipas saj, shkak i largimeve është korrupsioni.
Edhe në këtë rast shprehet Tabaku mungon vullneti politik për të rregulluar problemin akut që mbyll dyert e shpresës.
“Për të mos përsëritur zgjedhjet e njollosura nga problematika e ndërhyrjes brutale politike sa në manaxhimin e procesit ashtu dhe në përfshirjen e elementëve jashtë politikë në të, si blerja e votave dhe përfshirjen e krimit të organizuar, ne duhet të tregojmë vullnetin politik jo në letër, jo me fjalë po me veprime konkrete.
Prandaj, shfrytëzoj mundësinë e dhënë sot për t’i kërkuar drejtuesit të SPAK, z. Dumani, përcaktimin e një Prokurori Special që do të mund të hetojë krimet zgjedhore dhe ato ndërlidhje që njollosën raportet e BE për vendin tonë.
Përkrah nismave ligjore, si paketa antikorrupsion propozuar nga Partia Demokratike, ne duhet të kemi dhe vullnetin politik për të zbatuar ligjin dhe për të mbrojtur interesin publik dhe kushtetutën në rastin e luftës kundër korrupsionit. Kjo luftë duhet të jetë një prioritet kombëtar nga kuvendi”, është shprehur deputetja e PD në mbledhjen e Këshillit Kombëtar të Integrimit Europian.
Discussion about this post