Banorët e Bërxullës sërish në protestë, bllokojnë rrugën

Banorët e Bërxullës kanë dalë sot për të disatën herë në protestë për të kërkuar të drejtën e tyre për pronën.

Prej 6 muajsh ata protestojnë duke bërë disa kërkesa në drejtim të institucioneve  për shpronësimin e drejtë sipas tyre të pronave që preken nga projekti i aksit Thumanë-Kashar. Ata kanë deklaruar se nuk do lejojnë punimet pa parë dokumentacionin dhe se do përshkallëzojnë protestat.

“Ky projekt nuk është bërë në terren, si është gjurma e rrugës në terren, është bërë në Itali nga google.

Na ka ardhur një çmim, 517 mijë lekë për metër katror për banesa. Kreu i Bashkisë Vorë dhe ai vetë është shokuar kur mori vesh çmimet që solli firma.

Ne nuk do t’i lëmë deri sa të vijë dhe të na prezantohet çdo gjë me dokumente. Duhet të vijnë me dokumente sa nënkalime do bëhen, rrugët dytësore. Ne do t’i përshkallëzojmë protestat, do rrimë dhe me ditë”, thanë banorët.

“Do të përshkallëzojmë protestën. Do rrimë deri në 48 orë pa lëvizur nga rruga. Do ta bllokojmë rrugën. Rrugët alternative i kanë. Shteti ka bllokuar BERZH-in për të dëmshpërblyer pronat.

Kjo rrugë që shikoni ju, bllokohen 100 mijë banorë. Këtu po bëhet një masakër. Nuk ka qeveri ta marrë vesh. Është zhvilluar nga studio e Italisë pa e parë askush në terren.

Të paktën një dron të kishin ngritur për ta studiuar. Kjo rrugë as Shqipërisë nuk i shërben. I shërben botës dhe Europës që duan të kalojnë. Bota të gjejë zgjidhje.  Ambasada amerikane i ka parë. Janë në dijeni të protestës sonë prej 6 muajsh dhe asnjë nuk merr kurajon”, shprehet banori.