Shqipëria synon që të fillojë me këmbën e mbarë kualifikueset e Euro 2024, teksa në ndeshjen e parë do sfidojë Poloninë në Varshavë, takim ky i programuar të luhet të hënën në orën 20.45. Sulmuesi i kuqezinjve, Sokol Cikalleshi është shfaqur përkrah teknikut Sylvinho, në konferencën për shtyp.
“Polonia është një ekip shumë i fortë dhe ne e dimë këtë, edhe pse e humbi ndeshjen me Çekinë, ne jemi fokusuar tek puna jonë.
Jemi munduar të krijojmë një ekip kompakt me trajnerin Sylvinho. Polonia vjen pas një performanca të mirë në Botëror, golat e shpejtë që pësuan e çekuilibrin skuadrën.
Ata kanë lojtarë të mirë që luajnë në ligat më të forta në Europë. Nuk duhet të futemi me idenë që ata janë të dobët.
Ne çdo ndeshje që futemi luajmë për fitore, duke parë grupin që kemi, çdo ndeshje ka specifikën e saj, do bëjmë një ndeshje kompakte, do bëjmë kujdes mos pësojmë gol, nuk duam që të pësojmë.
Nesër s’duhet të humbim, ne kemi forcën dhe strategjinë tonë, fusha do e tregojë çfarë kemi punuar. Është një skemë klasike ku çdo lojtar e ndjen veten komod.
Me skemën 3-5-2 nuk kemi arritur aty ku duhet. Ne mund të bëjmë edhe më mirë. Ne jemi një Kombëtare e vogël dhe çdo lojtar është i rëndësishëm.
Këta janë lojtarët, nuk fokusohem tek ajo që na mungon por tek ajo që kemi. Jemi një grup që mbështetemi, duke qenë bashkë dhe me harmoni do futemi në fushë dhe të bëjmë më të mirën”, deklaroi ai.
/Balkanweb
Discussion about this post