Sali Berisha në konferencë për mediat deklaroi se në PD nuk ka hyrë asnjë para ruse. Berisha tha se SPAK është i kapur nga partia-shtet.
“Për financimin rus, Basha duhet të ballafaqohet me provat, është përgjegjësi personale e tij dhe jo e PD. Nuk ka asnjë element të ri krahasuar me dosjen e prokurorisë që e hapi dhe mbylli Edi Rama. Nuk kemi asgjë të re. Kemi vetëm faktin që PD-ja nuk ka në financat e saj një qindarkë të vetme ruse.
Kështu që nuk do të ketë asnjë dorëzim dosjeje. Asnjë qindarkë nga 500 mijë eurot, nuk ka kaluar në sirtarët e PD-së. SPAK është kapur nga partia-shtet”, tha ai.
Berisha foli më tej edhe për atë që e quan skandal të lobimit të MCGonigal.
“Ka një zhvillim, zhvillimi është aktakuza e organeve amerikane të drejtësisë, në të cilën Edi Rama ka kontraktuar McGonigal për hetimin e lobistit Nick Muzin, në të cilën Edi Rama nëpërmjet këshilltarit të tij privat, Dorian Duçka ka dërguar dy dëshmitarë nga Europa, nuk specifikohet vendi, për të dëshmuar para FBI-së lidhur me financimin rus të PD-së. Çfarë kemi të bëjmë këtu? Këtu kemi të bëjmë me një vepër krimi shumë të rëndë të Edi Ramës, i cili konfirmoi edhe në daljen e tij në Opinion se dëshmitarët janë dërguar dhe se ata janë njerëz të PD-së. Domethënë, Edi Rama, këshilltari i tij Duçka, kontraktuan McGonigal dhe e furnizuan atë, e paguan de facto, se paratë Agron Nezës ia ka dhënë Dorian Duçka.
A përbën kjo një detyrim hetimor për prokurorinë? E padiskutueshme. Edi Rama del se fsheh krimin. Ai automatikisht vendoset nën hetim. Dorian Duçka vendoset automatikisht nën hetim. Duhet të tregohen se kush janë dëshmitarët dhe të dëshmojnë të vërtetën pranë prokurorisë. Lulzim Basha duhet të ballafaqohet me të gjithë provat e reja që sjellin Duçka, dëshmitarët dhe Rama në kuadrin qoftë të larjes së parave, qoftë të financimit rus. A hap SKAP-i partisë çështje për këtë çështje? Ai është organi më i kapur në Europë sot”, tha Berisha.
Discussion about this post