Autoriteti i Aviacionit Civil të Shqipërisë është institucioni që bën rregullimin e transportit ajror në vend. Ai gjithashtu kontrollon trafikun ajror, sigurinë ajrore dhe drejtorinë e Aeroporteve. Këto janë përgjegjësi të mëdha, prandaj ata që punojnë aty i lejojnë vetes trajtim me kushte luksi.
Në Aeroportin “Nënë Tereza” shpesh raportohen probleme nga më të shumtat, qoftë me mungesën e sigurisë, probleme me udhëtime, vonesa, mungesë shërbimi. Nga pikëpamja ekonomike, ndërmarrja që mbledh tarifat e aviacionit, duhet të ishte fitimprurëse. Në fakt, bilanci i AAC regjistron vetëm humbje për vite me radhë. Por, këto fakte nuk i interesojnë personave përgjegjës. Madje as kreut të Autoritetit të Aviacionit Civil, Maksim Et’hemaj, i cili firmos për të harxhuar fondet në dispozicion.
Rasti i fundit i AAC është me tenderin që ka regjistruar me 27 mars 2023, në Agjencinë e Prokurimeve Publike. Bëhet fjalë për prokurimin me objekt “Blerje orendi dhe mobile zyre”, për të cilin Et’hemaj ka ndarë 30 milionë lekë. Kontrata pritet të nënshkruhet ditën e nesërme. Dhe këto miliona do ikin pa problem fare për karrige, kolltukë, tavolinë, rafte dhe abazhurë në selinë e Et’hemajt.
Kujtojmë se Autoriteti gjendet aktualisht nën influencën e oligarkut Shefqet Kastrati, i cili ka blerë koncesionin e aeroportit.
Pak muaj më parë Gijotina.com ka denoncuar se në interes të grupit “Kastrati” ka ndryshuar ligjin “Për organizimin dhe funksionimin e Autoritetit të Aviacionit Civil”. Me ndryshimet e reja, i janë marrë të gjitha fuqitë ACC. Duke vendosur kontroll mbi tarifat dhe të ardhurat e tjera që krijohen aty.
Në ligjin e ri, shtohet Neni 25 i cili përcakton që në rast se bëhen ankesa për vendimet e marra nga Autoriteti i Aviacionit Civil, ato mund t’i anulojë ministri dhe jo më nga Gjykata Administrative. Pra, Kastrati mund t’i bëjë një telefon Belinda Ballukut ose Edi Ramës dhe çdo pakënaqësi shuhet në nivele të larta politike.
Një tjetër ndryshim është bërë në nenin 6 ku në ligjin e vjetër, për vetë rëndësinë që ka administrimi i tarifave, masa e tyre vendosej nga Këshilli i Ministrave. Ndërsa me ndryshimet në ligjin e ri bëhet me një urdhër të thjeshtë të dy ministreve të kabinetit Rama.
Ndërkaq me ndryshimet e ligjit dhe me përcaktimet në kontratën e Koncesionarit, “Kastratit” i hapet rruga të ndërhyjë në tarifat që paguajnë qytetarët në aeroport pa raportuar se sa para mbledh. Në këto kushte, drejtuesve të AAC nuk u mbetet gjë tjetër vetëm të shijojnë komoditetin dhe luksin e zyrave!
Lexo edhe Një “kafe” nga Çuçi për Kastratin, i fal super tenderin 4.5 MLD lekë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post