Ish-presidenti i Kosovës, Hashim Thaçi do të flas pa betim sot para trupit gjykues në Hagë. Kjo është bërë e ditur nga mbrojtja e tij gjatë seancës së sotme.
Deklarimi i Thaçit pritet te bëhet në përfundim të paraqitjes së fjalës hyrëse të ekipit të tij mbrojtës.
Në Dhomat e Specializuara të Kosovës në Hagë po prezantohen deklaratat hapëse nga ekipet mbrojtëse.
I pari që ka filluar është avokati i Thaçit, Gregory Kehoe i cili ka folur për jetën e të akuzuarit gjatë viteve 1998-1999.
Gjatë paraqitjes së provave në të cilat synon të mbështetet, Kehoe ka folur edhe për luftën në Kosovë, masakrat serbe dhe dëbimet që u bëheshin shqiptarëve atë kohë.
Ndër te tjera, janë lëshuar video deklarime e intervista të Thaçit ku bënte thirrje për bashkëjetesë midis serbëve dhe shqiptarëve në Kosovë dhe ku deklaronte që Kosova është multietnike.
Në fjalimin para Speciales, Thaçi ka thënë se pret që gjykimi ndaj tij dhe ish-krerëve të tjerë të Ushtrisë Çlirimtare të Kosovës të jetë i drejtë dhe të përfundojë shpejt.
“Jam i kënaqur që procesi e ka dëshmuar edhe njëherë se nuk ka pasur trafikim organesh e shtëpi të verdhë. Kosovës i është hequr reja e zezë të cilën ia kishte vënë Raporti i Martyt”, ka thënë Thaçi.
Kjo është dita e dytë e gjykimit ndaj ish-krerëve të UÇK-së.
Në galerinë për publikun, përveç gazetarëve ndodhen edhe familjarët e të akuzuarve.
Me t’u ngritur perdja në sallë, Thaçi dhe Selimi janë parë duke përshëndetur me dorë familjarët e tyre qe ndodheshin lartë në galeri./Kosova Press
Discussion about this post