Kapitulli është mbyllur/ Mancini i “vë vizën” sulmuesit

Më në fund edhe Mancinit, i është “mbushur kupa” me Mario Balotellin por kjo gjë, sinqerisht, nuk përbën më lajm.

“Il Mancio” i ka vënë vizën sulmuesit italo-ganez prej kohësh tashmë, që në vitin 2011 më saktë, gjatë fazës përgatitore në SHBA.

Në atë kohë, “Super Mario” vendosi të dëfrehej më shumë se duhej gjatë takimit LA Galaxy-Manchester City, me Mancinin që për pak sa e përzuri nga ekipi në atë çast bad boy-n e lindur në Palermo.

Tensioni mes tyre u sheshua (pak) gjatë sezonit, aq sa Balotelli ishte një nga protagonistët e titullit të fituar nga City në 2012 (asisti për golin e titullit erdhi pikërisht nga ish-lojtari i Interit).

Megjithatë, paqja nuk zgjati shumë, me Balotellin që në janar të 2013 u transferua te Milani.

Fast forward, në vitin 2023 dhe ja ku jemi në një tjetër episod të sagës Mancini-Balotelli. U fol gjatë ditëve të fundit për një grumbullim të sulmuesit të Sion në kombëtare por Mancini e frenoi entuziazmin e atyre që donin Marion përsëri si pjesë të Italisë.

Mungesa e sulmuesve bëri që trajneri të kërkonte alternativa në Argjentinë, ku gjeti Mateo Reteguin, i cili vishte ngjyrat ‘Azzurre’ falë paraardhësve të tij italianë, por shtypi avancoi duke raportuar, se Balotelli madje ofroi të rikthehej në ‘Nazionale’.

“Ka sulmues italianë në formë shumë të mirë, më besoni”,- ka shkruar Mancini në rrjetet sociale.

Më pas, trajneri i kombëtares është përballur sërish me temën mediatike në një event të federates, ku Mancini është pyetur për Super-Marion. “Unë mendoj se kjo çështje është mbyllur,” u shpreh ai.

Mario Balotelli, 32 vjeç, aktualisht luan për Sion. Ai ka shënuar 5 gola në 15 ndeshjet që ka luajtur këtë sezon në kampionatin zviceran.