Ish-kryeministri Sali Berisha ka deklaruar se në Kuvendin e 11 dhjetorit që ai ka thirrur, Azem Hajdari do të shpallet ‘President nderi i përjetshëm i PD-së’.
Berisha e tha këtë gjatë foltores me demokratët e Librazhdit, ku ndër të tjera u shpreh se një nga shkaqet themelore të dështimit 8-vjeçar të kësaj force politike është largimi i PD nga shtyllat kryesore të saj.
“Kam kënaqësi t’ju informoj ju dhe të gjithë demokratët se në Kuvendin e datës 11 dhjetor, tribuni i pluralizmit shqiptar, themeluesi i PD, Azem Hajdarit do shpallet President nderi i përjetshëm i kësaj partie.
Së dyti, e vërteta është se në një analizë të ftohtë një nga shkaqet themelore të dështimit tonë 8-vjeçar, pa asnjë diskutim është largimi i PD nga shtyllat kryesore të saj, ekzistencës së saj, të përndjekurit politik, pronarët dhe vlerat kryesore të forcave konservatore, familja, dinjiteti njerëzor, prona dhe interesi kombëtar” – u shpreh Berisha.
Ai gjithashtu tha se në vitin 1997 Partia Demokratike mbijetoi falë të përndjekurve politikë.
“Ju me të drejtë rikujtuat 97, unë u them demokratëve se nëse PD mbijetoi në 97, mbijetoi para së gjithash dhe mbi të gjitha nga mbështetja e të përndjekurve politik. Ata qëndruan të pamposhtur. Asnjëherë nuk harroj unë figurat e tyre, nuk harroj qëndresën e tyre. Ata ishin të palëkundur, Ishin të pamposhtur. I pamposhtur ishte Pjetër Arbnori, Ali Spahia. Në fund të fundit ishte periudhë e vështirë, u bë gjithçka që ta asgjësonin PD. Pse? Sepse ata nuk i falnin PD rrëzimin e diktaturës” – tha Berisha.
Discussion about this post