PDK dhe LVV janë partitë fituese të zgjedhjeve të parakohshme në komunat veriore të Kosovës. Por duket se fakti që pjesëmarrja ka qenë e ulët ka bërë që serbët të mos presin mirë faktin që veriu të drejtohet nga parti shqiptare.
Nënkryetari i Listës Serbe, Millan Radoiçiç, tha se populli serb në Kosovë “nuk do të lejojë kurrë” që komunat me shumicë serbe në veri të vendit të udhëhiqen nga ata që kanë fituar “1 apo 2 për qind të votave” në zgjedhje. Ai nuk saktësoi se çfarë masash mund të ndërmerren.
Edhe i ashtuquajturi drejtor i Zyrës për Kosovën në qeverinë serbe Petar Petkoviç tha se fitues të zgjedhjeve në veri të Kosovës janë “populli serb në Kosovë”, pasi sipas tij bojkotoi zgjedhjet. Ai i quajti zgjedhjet “antidemokratike dhe jolegjitime”, e po ashtu, Petkoviç kritikoi Organizatën për Siguri dhe Bashkëpunim në Evropë (OSBE) që lejoi mbajtjen e zgjedhjeve në kontejnerë.
“Kjo është një disfatë për atë pjesë të bashkësisë ndërkombëtare që e mbështeti Kryeministrin e Kosovës, Albin Kurtin dhe deklaroi se do t’i njohë rezultatet e zgjedhjeve,”- tha Petkoviç.
Të dielën e 23 prillit, në katër komunat në veri – Mitrovicë e Veriut, Zubin Potok, Zveçan dhe Leposaviq – u mbajtën zgjedhjet e parakohshme lokale. Pjesëmarrja në proces ishte e ulët – pak më shumë se 3 për qind, sipas Komisionit Qendror të Zgjedhjeve.
Kjo, pasi Lista Serbe – partia më e madhe e serbëve në Kosovë – nuk mori pjesë në zgjedhje dhe u bëri thirrje qytetarëve serbë t’i bojkotojnë ato. Në garë ishin dhjetë kandidatë – prej tyre vetëm një e komunitetit serb. Sipas të dhënave të KQZ-së, në Mitrovicë të Veriut dhe në Leposaviq fituan kandidatët e Lëvizjes Vetëvendosje, ndërsa në Zubin Potok dhe Zveçan ata të Partisë Demokratike të Kosovës.
Discussion about this post