Konfiskimi i pronave me VKM, sot seanca e dytë në Kushtetuese

Sot zhvillohet seanca e dytë në Gjykatën Kushtetuese për padinë e grupit të PD kundër VKM-së së qeverisë për ndërtimet pa leje.

Në seancë do të shqyrtohet padia e 28 deputetëve për shfuqizimin e VKM-së për rregullat dhe procedurat për konfiskim për interes publik të objekteve të ndërtuara për qëllime përfitimi.

Seanca e kaluar u shty pasi pala ligjore e qeverisë tha se dy prej deputetëve që kanë nënshkruar, Grida Duma dhe Alfred Rushaj nuk janë më deputetë dhe padia nuk kishte nënshkruesit e nevojshëm.

Përfaqësuesi ligjor i PD-së Marash Logu tha se kjo kërkesë nuk është legjitime pasi në momentin që ata kanë firmosur kanë qenë deputetë.

Logu së bashku me deputetët Bardhi e Çupi kanë siguruar 3 firma të reja të PD-së, Petrit Doda, Oriela Nebiaj dhe Zheni Gjergji për të rrëzuar pretendimet e qeverisë

Kjo procedurë është ndjekur nga përfaqësuesi ligjor i PD-së, i cili pretendon se Gjykata Kushtetuese e ka pasur një precedent të mëparshëm.