Faturat e pashlyera në OSHEE mbeten të larta edhe për 2021, pavarësisht se kanë pësuar një reduktim të lehtë krahasuar me 2020. Të dhënat zyrtare të publikuara nga OSHEE bëjnë me dije se në total shuma e faturave të palikujduara arriti në 76,93 miliardë lekë, nga 77.47 miliardë lekë, që ishte deri në fund të muajit gusht.
Por, të dhënat e përgjithshme, duke marrë parasysh krizën në të cilën ndodhet vetë institucioni, por edhe familjarët, tregojnë se vlera mbetet ende e lartë dhe nuk ka sinjale për përmirësime. Deri më tani niveli i borxheve që klientët i kanë OSHEE-së është një nga më të lartët, që prej vitit 2013, ku niveli i borxhit ishte 71.37 miliardë lekë. Sa i takon 9-mujorit të këtij viti, rënie e borxhit është shënuar thuajse për të gjitha kategoritë, duke përfshirë konsumatorët familjarë, biznese, institucionet buxhetore. Por, nga ana tjetër regjistrohet edhe një nivel i lartë detyrimesh të prapambetura që ky institucion i ka qeverisë, duke bërë që të shfaqë një përformancë të dobët në investime.
Kjo mungesë investimesh është përkthyer në cilës të dobët të energjisë për qytetarët, kur jo pak herë ka pasur ankesa, pasi pasojat i vuajnë edhe ata që kanë qenë të rregullt me pagesën e faturave.
Nga ana tjetër ujësjellës-kanalizimet vazhdojnë të rrisin krizën financiare dhe janë institucionet që kanë borxhin më të lartë ndaj OSHEE. Sipas të dhënave të publikuara nga OSHEE kjo kategori regjistron borxhin në masën e 15,47 mld lekëve, nga 15.25 mld lekë që ishte kjo vlerë për 8-mujorin. Ujësjellësit, nga ana tjetër gjithashtu kanë zbehur cilësinë e shërbimeve, madje është një institucionet që ofron shërbim bazë, atë të furnizimit me ujë, por që qytetarët ankohen më së shumti.
Sa i takon konsumatorëve familjarë, që janë edhe debitorët më të mëdhenj për 9-mujorin arritën një borxh total prej 45.41 mld lekësh, nga 45.78 mld lekë që ishte në periudhën 8-mujore. Ndërkaq, edhe bizneset regjistrojnë një borxh prej 11.51 mld lekësh për fatura energjie të palikujduara, nga 11.81 mld lekë që ishte kjo vlerë për periudhën janar-gusht. Në total, arkëtimet nga Operatorit i Shpërndarjes së Energjisë Elektrike rezultojnë në 95.3% e faturave të emetuara.
Discussion about this post