Përfaqësuesi ligjor i Partisë Demokratike Marash Logu ka folur në përfundim të seancës së mbajtur ditën e sotme në Gjykatën Kushtetuese ku ata kërkojnë shfuqizimin e ligjit për konfiskimin e ndërtimeve pa leje me VKM.
Ai u shpreh se nuk kanë marrë asnjë përgjigje nga përfaqësuesit e qeverisë. Ai tha se sot një qytetar që rregullon çatinë e shtëpisë rrezikon të gjobitet nëse nuk ka marrë leje gjë që nuk ndodh me njerëzit pranë qeverisë që ndërtojnë godina pa leje.
“Pas dy seancave shtyrjes të panevojshme dhe të paligjshme sot patëm mundësi të merremi me thelbin dhe arsyen pse i jemi drejtuar Gjykatës Kushtetuese. Dhe arsyet pse VKM që kemi sjellë në Kushtetuese duhet të shfuqizohet. Sa të panevojshme dhe abuzive ishin shtyrjet deri në seancën e sotme. Të kishim një vendimmarrje sa më të shpejtë nga ana e Gjykatës Kushtetuese. Patëm mundësi të paraqesim faktet, provat dhe rastet.
Nga ana tjetër besoj se e keni ndjekur me shumë vëmendje seancën ku nuk u mor asnjë përgjigje nga përfaqësuesit e qeverisë. Mundoheshin të bënin bisht për të shmangur përgjegjësinë që kanë para qytetarëve shqiptarë. Nëse je një qytetar i thjesht që ke riparuar çatinë e shtëpisë, shkon në burg dhe gjobitesh. Nëse je ndërtues të jepet mundësia ta legalizosh, Kjo pabarazi e trajtimit të qytetarëve me njerëzit pranë qeverisë është arsyeja pse Kushtetuesja duhet të vendosë për shfuqizimin e kësaj VKM-je”, deklaroi ai.
Logu tha se për miqtë e kryeministrit ofrohen të gjitha lehtësitë e mundshme, ndërsa ata që mund të kenë mbajtur qasje kritike aplikohet masa më e rëndë, që është prishja e ndërtimit.
“Gjithë përpjekjet që bëri qeveria për të shtyrë proceset në Kushtetuese janë me qëllimin që t’ i japë kohë që të rregullojnë disa aspekte anti kushtetuese të kësaj VKM. Parlamenti noterizon çdo akt edhe ligj qoftë edhe në kundërshtim me kushtetutën.
Për miqtë e kryeministrit ofrohen të gjithë lehtësirat që të legalizohen ndërtimet e paligjshme, për ata që kanë mbajtur ndonjë qasje kritike aplikohet masa më e rëndë që është prishja e ndërtimit. Në raste të caktuara pavarësisht se ka qenë ndërtim pa leje, diku është konfiskuar, dikush është prishur. Askush nuk di të thotë pse qeveria shqiptare ndjek standarde të ndryshme. Ky është një diskriminim i pastër. Nuk bazohet as në kushtetutë dhe as në ligj. E ka zgjedhur kjo maxhorancë”, u shpreh Logu.
Discussion about this post