Kreu i grupit parlamentar të PS-së, Taulant Balla ka dalë në një deklaratë për mediat pas mbledhjes së grupit parlamentar.
I pyetur nga gazetarët se cili do të jetë qëndrimi i selisë rozë, në lidhje me kritikat që po bëhen vazhdimisht nga deputeti socialist Erion Braçe, Balla tha se e ka koleg të vjetër dhe se me të diskuton çdo ditë, duke i bërë bisht pyetjes.
“Erjoni është kolegu im shumë i vjetër që diskutoj çdo ditë, secili ka këndvështrimet e tij dhe vlerësimet e tij, janë çështje të vendimmarrjes së përbashkët politike”, tha Balla.
Ndër të tjera, Balla komentoi dhe punën për ngritjen e Komisionit të Reformës Zgjedhore, ndërsa pohoi se Komisioni i Venecias është ftuar që të japë një opinion urgjent.
“Ne nuk duhet të paragjykojmë punën e komisionit. PS garanton se brenda komisionit të Posaçëm ka barazi mes anëtarëve dhe të drejtë vetoje mes dy partive. Besoj se ne do ta gjejmë zgjidhjen në këndvështrimin ose themelin e hedhur prej shumë vitesh kur janë ngritur komisionet e Posaçme. Unë nuk dua që të bëj debat më për këtë çështje as deklarata që si vlejnë nevojës që ka kuvendi në procedurën parlamentare. Opinioni i Venecias është ftuar nga kryetarja e kuvendit për të dhënë një opinion urgjent në ditët e para të dhjetorit. T’i shmangim diskutimet në publik të kësaj çështje”, tha Balla.
Balla u pyet edhe në lidhje me kërkesën e SPAK për një mandat të pakufizuar në kohë ndaj prokurorëve të këtij institucioni, ku tha se çështja do të merret në shqyrtim, po pa dhënë një afat.
Discussion about this post