Kosovë-Shqipëri, zbulohet takimi i radhës mes qeverive

Dy ditë para festës së Pavarësisë së Shqipërisë, do të mbahet mbledhja e përbashkët mes qeverisë së Shqipërisë dhe asaj të Kosovës. Mësohet se mbledhja e rradhës e zyrtarëve do të zhvillohet në Elbasan.

Kjo do të jetë mbledhja e shtatë mes dy qeverive teksa, lajmi  është bërë i ditur nga një njoftim i qeverisë së Kosovës, pas takimit të kryeministrit të Kosovës me ministrin e Brendshëm të Shqipërisë, Bledi Çuçi.

“Në këtë takim të sotëm, që u mbajt një javë para mbledhjes së shtatë të përbashkët të Qeverisë së Republikës së Kosovës dhe Qeverisë së Republikës së Shqipërisë, e cila do të mbahet më 26 Nëntor, u bisedua edhe për marrëveshjet e deritanishme në mes dy vendeve tona dhe ato potenciale të reja në fushën e sigurisë”, thuhet në njoftimin e qeverisë së Kosovës.

Gjatë këtij takimi është diskutuar dhe për intensifikimin dhe fuqizimin e marrëdhënieve mes dy vendeve në fushën per sigurisë dhe interesit të përbashkët.

“U bisedua edhe për marrëveshjet e deritanishme në mes dy vendeve tona dhe ato potenciale të reja në fushën e sigurisë. Kryeministri Kurti dhe ministri Sveçla u shprehën vullnetplotë për intesifikimin dhe fuqizimin e marrëdhënieve në mes dy shteteve në fushën e sigurisë, si fushë e interesit të përbashkët”.

Qeveria e Kosovës dhe ajo e Shqipërisë që nga viti 2014 mbajnë mbledhjet e përbashkëta, në favor të  bashkëpunimt mes dy vendeve. Në të tilla takime gjithashtu,  nënshkruhen marrëveshje për fusha të ndryshme, të cilat stimulojnë zhvillimin e vendit.

Në mbledhjen e fundit në Tiranë është nënshkruar edhe një deklaratë e përbashkët ndërmjet dy qeverive dhe Këshillit të ministrave të Republikës së Shqipërisë, për t’i rekomanduar Kuvendit të Kosovës dhe Kuvendit të Shqipërisë mbikëqyrjen e zbatimit të marrëveshjeve të nënshkruara në mes të dy qeverive.

Këto marrëveshje kanë pasur për qëllim një qeverisje të përbashkët strategjike, në veçanti eliminimin e barrierave tregtare mes dy shteteve.

Por, shumë herë qeveritë janë kritikuar se marrëveshjet e nënshkruara kanë mbetur vetëm në letër, pa u zbatuar në praktikë.Në Kosovë, institucionet nuk ka ndonjë të dhënë të publikuar se sa këto marrëveshje janë zbatuar në praktikë.