Sekretari i Përgjithshëm i NATO-s, Jens Stoltenberg tha se ka zhvilluar një bisedë telefonike me përfaqësuesin e Lartë të BE-së, Josep Borrell, për ngjarjet në Kosovë.
Ai tha se Kosova duhet që të mospërshkallëzojë situatën, dhe të mos ndërmarrë hapa destabilizues, raporton Express.
“Kam folur me Përfaqësuesin e Lartë të BE-së, Josep Borrell, rreth Kosovës. Prishtina dhe Beogradi duhet të angazhohen në dialogun e udhëhequr nga BE-ja tani, si mënyra e vetme drejt paqes dhe normalizimit. Prishtina duhet të mospërshkallëzojë dhe të mos marrë hapa të njëanshëm dhe destabilizues. Misioni i NATO-s, KFOR, do të vazhdojë të sigurojë një mjedis të sigurt”, ka shkruar ai në Twitter.
Aleanca e NATO-s dje i ka bërë thirrje Kosovës që të qetësojë situatën në veri të vendit, një ditë pas tensioneve.
Zëdhënësja e NATO-s, Oana Lungescu, përmes një postimi në Twitter tha se të gjitha palët duhet t’i zgjidhin çështjet përmes dialogut, derisa theksoi se KFOR-i mbetet vigjilent në këtë rajon, raporton Gazeta Express.
“Ne u bëjmë thirrje institucioneve në Kosovë të shtensionojnë menjëherë situatën, dhe u bëjmë thirrje të gjitha palëve që të zgjidhin situatën përmes dialogut. Misioni i NATO-s, KFOR, vazhdon të jetë vigjilent dhe të ofrojë mjedis të sigurt”, shkroi Lungescu.
Discussion about this post