Gjatë bashkëbisedimit me të rinjtë në Durrës, Lulzim Basha, ish-kryetar i PD, u përball me një qytetar që e quajti “besprerë”, fjalë të cilën më herët Basha e ka dëgjuar si akuzë edhe nga Sali Berisha dhe çdo mbështetës i tij, pas vendimit të 9 shtatorit 2021, kur vendosi të largojë ish-Kryeministrin nga Grupi Parlamentar me argumentin se ishte shpallur “non grata”.
“Hajde, hajde ta marrësh vesh kush ka pre kë? Hajde, hajde se unë nuk shaj”, iu drejtua Basha, personit që e akuzoi.
Në bashkëbisedimin me të rinjtë, Basha përsëriti akuzat se Sali Berisha po mban peng Partinë Demokratike. Ai tha se i ka kërkuar vazhdimisht Berishës të reflektonte, ndërsa u shpreh se vitin e kaluar dha dorëheqjen për të mirën e partisë.
“I kam kërkuar me respektin dhe mirënjohjen që jemi mësuar në familje, të reflektonte për të mirën e familjes politike. Pata besim se do ta bënte. Dhe kur kjo nuk u bë, mora një vendim të vështirë. Nëse do të ndodhte ndryshe, sot do të kishin kryetarin tonë në krye të bashkisë së Durrësit.
Do të kishim, një rezultat tjetër nga ai i 14 majit. Një vit më parë, hodha një hap pas për të mirën e PD-së. Por, sikurse e shikoni, gjërat u bënë më keq”, tha Basha.
Basha tha se bashkimi i PD-së bëhet duke u përqafuar vlerat.
“Si do të ndodhë bashkimi? Nuk ka ngjitje mekanike. Ne duhet të bashkohemi rreth vlerave. Kushdo që e kupton PD si një instrument për të përmirësuar Shqipërinë, do të bëhet me ne”, u shpreh ai.
Discussion about this post