“Drejtësi të barabartë për të gjithë”, u shpreh Kryeministri Edi Rama, gjatë një takimi të zhvilluar në Tiranë, në kuadrin e atij që e konsideron si turi i falenderimeve.
Deklarata e Ramës vjen pak orë pasi Saimir Tahiri, ish-ministër i Brendshëm, dhe i konsideruar nga vetë Kryeministri si një ministër kampion, gjatë kohës që ushtronte detyrën, u lirua nga burgu me një vendim të Gjykatës së Elbasanit, ndërkohë që i kishte mbetur pa shlyer edhe 1 vit e 7 muaj nga dënimi i dhënë nga GJKKO.
“Këtu ne kemi hapur vetë këtë kuti të Pandorës sepse nuk kemi pranuar që të marrim përsipër përgjegjësinë e qeverisjes së këtij vendi duke mbajtur këmbën tek kapaku i kësaj kutie për të vazhduar avazin e sa shekujve ku të pushtetshmit, të fuqishmit apo të mbrojturit e këtij vendi, asnjëherë nuk janë thirrur nga drejtësia. Këtë e kemi bërë ne. 100 herë të kthehesha mbrapa, do të bëja të njëjtën gjë.
Duhet të vazhdojmë në një rrugë me sy mbyllur duke bërë sikur s’kuptojmë ose kush është i joni mund të bëjë çfarë të dojë me ligjin dhe me pasurinë e përbashkët dhe nuk preket. Apo duhet të ndjekim një rrugë tjetër. E kemi zgjedhur këtë rrugë tjetër dhe në këtë rrugë nuk ka asnjë kthim prapa dhe asnjë kompromis me askënd. Natyrisht që unë personalisht e kam ditur që kjo nuk është një rrugë që do të mbarojë shpejt, rruga e në mandati apo dy mandateve e një gjenerate për të arritur që ky vend të ketë drejtësi të barabartë për të gjithë.”, tha Rama.
Discussion about this post