Escobar paralajmëron edhe Vuçiç: T’i kthesh shpinën marrëveshjes, do të thotë t’i kthesh shpinën Evropës

I dërguari i posaçëm i SHBA-së për Ballkanin Perëndimor, Gabriel Escobar, deklaroi se përgjatë takimit me presidentin serb Aleksandar Vuçiç, ai i tregoi qartë se t’i kthesh shpinën marrëveshjes do të thotë t’i kthesh shpinën Evropës.

Escobar ka përmendur si pasoja dështimin e integrimeve të mëtejshme në BE dhe bashkëpunimin më të ngushtë me Evropën.

“Para së gjithash, duhet të shtensionojmë menjëherë situatën, që do të thotë se shpresojmë që kryetarët e komunave të mos tentojnë t’i shfrytëzojnë ato objekte komunale dhe që Policia e Kosovës të tërhiqet nga ndërtesat, por edhe demonstruesit serbë të largohen nga ato lokacione. Dhe nëse ka zgjedhje të reja dhe kur ka zgjedhje të reja, serbët duhet të marrin pjesë në to pa asnjë parakusht”, tha Escobar.