Vangjush Dako, ish-Kryebashkiaku i Durrësit, dhe 8 të arrestuarit e tjerë, ish-funksionarë të kësaj bashkie, pritet të dalin nesër para GJKKO ku do të rivlerësohen masat e sigurisë.
SPAK e akuzon Dakon për shpërdorim detyre dhe falsifikim dokumentesh. Në njoftimin për mediat, SPAK bën me dije se Dako në bashkëpunim me ish-zyrtarët e tjerë “kanë legalizuar një objekt të ndërtuar para zbardhjes së lejes së ndërtimit, dhe jo sipas projektit të miratuar”.
Bëhet me dije se ish-kryebashkiaku së bashku me drejtorin e firmës së ndërtimit, arkitekten dhe topografët kanë shpërdoruar detyrën, ku citohet se këta të fundit “nuk kanë pasqyruar në dokumentacionin tekniko-ligjor, të objektit të vërtetën në lidhje me kohën kur janë bërë punimet dhe është realizuar ndërtimi, duke bërë që këto akte të jenë të fallsifikuara në përmbajtje”.
Gjithashtu, Dako dhe ish-zyrtarët e tjerë të arrestuar me të, po hetohen se në vitin 2014, Bashkia Durrës ka kryer një procedurë prokurimi, për shërbim konsulence, sigurimin e një projekti të quajtur “Projektim zbatim për Promenadën Bregdetare dhe Plazhin publik nga Bërryli deri në Currila”.
Në funksion të kësaj, Kryetari i Bashkisë Durrës Vangjush Dako ka ngritur një grup pune i përbërë nga shtetasit A.Q., A.T. D.D. dhe B.S. anëtarët e të cilit kanë patur si detyrë, përcaktimin e termave të referencës dhe fondin limit, bazuar në V.K.M. Nr.444 datë 05 Shtator 1994. Në fakt, për shkak të disa gabimeve në llogaritje tarifa e studimit dhe vlera e fondit limit, është llogaritur dhjetë herë më e lartë se sa duhet të ishte, sipas kritereve të Vendimit të Këshillit të Ministrave.
Avokati i Vangjush Dakos në reagimet mediatike e ka cilësuar caktimin e masës së sigurisë “arrest me burg” si një vendim të marrë nën presion, ndërkohë që shtoi se një prej akuzave është në limitet e parashkrimit.
Nuk dihet nëse GJKKO në seancën e së enjtes do të vlerësojë si të ligjshëm arrestimin apo do të vendosë një tjetër masë sigurie.
Discussion about this post