Ceremonia e Topit të Artë 2023, caktohet data dhe vendi ku do të mbahet

“France Football” ka zbuluar këtë të premte datën e ceremonisë së dhënies së çmimit të Topit të Artë 2023.

Kështu do të duhet të prisni deri më 30 tetor për të ditur pasardhësin e Karim Benzema. Si çdo vit edhe tani, ceremonia do të mbahet në Theatre du Chatelet në Paris duke nisur nga ora 19:00.

Në njoftimin për shtyp saktësohet se zbulimi i lojtarëve të nominuar për Topin e Artë mashkull dhe femër, trofeun Kopa (i riu më i mirë), si dhe trofeun Yachine (portieri më i mirë), do të bëhet më 6 shtator.

Të nominuarit për çmimin Socrates, një trofe që shpërblen futbollistët e angazhuar në projekte shoqërore që nga viti 2022, do të shpallen më herët, më 7 korrik.