Klubi i Partizani ka zyrtarizuar sot firmën me trajnerin kroat Zoran Zekiç. Klubi i kuq, ka postuar lajmin mbi arritjen e marrëveshjes si dhe firmën me 49-vjeçarin.
Kampionët e saposhpallur të Superiores kanë bërë të qartë se Zekiç niste që sot punën zyrtarisht, pasi ky prezantim përkonte edhe me nisjen e përgatitjeve për pjesëmarrjen në Kupat e Europës.
Sipas njoftimit të klubit, Zekiç merr drejtimin e skuadrës për sezonin 2023-2024, duke lënë të kuptohet që marrëveshja është vetëm njëvjeçare.
NJOFTIMI I KLUBIT
FK Partizani zyrtarizon arritjen e marrëveshjes me trajnerin Zoran Zekiç. 49-vjeçari nga Kroacia, i cili do të drejtojë kampionët e Shqipërisë në sezonin e ri 2023-2024, është prezantuar sot nga presidenti Gazment Demi dhe drejtori sportiv Arbër Abilaliaj.
Në sezonin e fundit Zekiç ishte pjesë e ekipit Slaven Belupo, ndërsa përgjatë karrierës si trajner ai regjistron edhe eksperienca në drejtimin e Sheriff Tiraspol, Osijek, Diośgyőr dhe Maksimir.
Zekiç vjen në drejtimin e 17-të herë kampionëve të Shqipërisë për të nisur një projekt ambicioz dhe fitues. Sot skuadra nis zyrtarisht përgatitjet për sezonin e ri futbollistik.
Discussion about this post