Qytetarët e Kosovës do të munden lehtësisht të pajisen me leje qëndrimi dhe leje punë në Shqipëri, me një afat deri në 5 vite.
Lajmi është bërë i ditur nga ministri i Brendshëm i Shqipërisë, Blendi Çuçi, i cili zbuloi se kjo marrëveshje do të nënshkruhet mes dy qeverive në mbledhjen e tyre të ardhshme.
“Sot, miratuam një nga marrëveshjet që do të nënshkruajmë të premten mes Shqipërisë dhe Kosovës që ka të bëjë me lejet e qëndrimit të shtetasve respektivë. Është lajm i mirë për shtetasit e Kosovës që do të marrin thjesht me një aplikim lejen e qëndrimit për 5 vite në Shqipëri dhe brenda saj edhe leja e punës. Është lajm i mirë edhe për shqiptarët që jetojnë në Kosovë që do të marrin leje qëndrimi me procedura të thjeshtuara. Është në vazhdën e disa marrëveshjeve që do të nënshkruajmë brenda sektorëve që përfshin Ministria e Brendshme”, ka shtuar ai.
Ministri i Brendshëm nuk iu ka shpëtuar as pyetjeve lidhur me shqetësimin e shqiptarëve për krijimin e një kampi refugjatësh në Shqipëri, si pasojë e një marrëveshjeje të fshehtë mes qeverisë shqiptare dhe asaj britanike.
Çuçi mohoi një gjë të tillë, duke thënë se një sqarim lidhur me këtë çështje ka ardhur dhe nga qeveritarët e tjerë.
“Nuk do të ketë kampe refugjatësh për interesa të vendeve të tjera në Shqipëri është thënë qartë nga kryeministri Edi Rama, ministrja e Jashtme, Olta Xhaçka, ministri i Drejtësisë, si dhe është thënë qartë edhe nga ministri i Brendshëm. Ai është një përcaktim që edhe kur kalojnë tranzit nuk do të qëndrojnë në Shqipëri, por janë të detyruar vendet e origjinës të përgjigjen për ata emigrantë dhe azilkërkues. Është e kundërta e asaj që thuhet në media”, ka përfunduar Çuçi.
Ndërkohë mbledhja e shtatë mes qeverisë së Kosovës dhe asaj të Shqipërisë do të mbahet dy ditë para festës së Pavarësisë së Shqipërisë, në Elbasan.
Discussion about this post