“Open Balkan” ka përplasur sot të dërguarin e Joe Biden, Gabriel Escobar me kryeministrin e Shqipërisë Edi Rama. Gjatë një adresimi online që kishte në konferencën për “Ballkanin e Hapur” që u mbajt në Kuvendin e Serbisë, Escobar tha se iniciativat rajonale duhet të jenë barabartë të hapura për të gjitha shtetet. Madje ai tha që, nëse kjo nisëm vazhdon të zhvillohet duke lënë disa vende jashtë, nuk do të funksionojë.
“Nëse në iniciativën “Ballkani i Hapur” (Open Balkan) nuk përfshihen që të gjashtë shtetet e Ballkanit Perëndimor, atëherë ajo nuk do të funksionojë. “Krahas kësaj, është me rëndësi që këto tre shtete të cilat iniciuan Ballkanin e Hapur të mbesin të hapura dhe të bisedojnë ngushtë edhe me tre partnerët e tjerë që mbesin skeptikë” deklaroi i dërguari amerikan për Ballkanin Perëndimor, Gabriel Escobar.
Escobar paralajmëroi që në mesin e sfidave të Ballkanit të Hapur mbesin kontrolli i kufijve pas hapjes së tyre, ulja e korrupsionit dhe ulja e kontrollit shtetëror në ekonomi. “Është koha që të lirohet potenciali ekonomik i shteteve të Ballkanit Perëndimor dhe të fuqizohet e ardhmja e tyre evropiane, theksoi gjatë fjalimit të tij, Ambasadori Amerikan në Beograd, Anthony Godfrey. Përkrahim planin e Ballkanit të Hapur, gjithëpërfshirës, në mënyrë që të sigurojë qarkullim të lirë të mallrave, njerëzve, kapitalit e shërbimeve” theksoi ai.
Reagon Rama
Kjo deklaratë e Escobar nuk është pritur aspak mirë nga kryeministri Edi Rama, i cili në fjalën e tij tha i bindur se, “Open Balkan” do të vazhdojë edhe pa pjesëmarrjen e të gjitha vendeve. Në përgjigje të Escobar ai tha se vendet nismëtarë të Open Balkan nuk e kanë për detyrë të bindin vendet e tjera të bashkohen. Ai theksoi se as supozimi që iniciativa nuk është e hapur për anëtarë të tjerë nuk është i vërtetë.
Sipas Ramës, Ballkani i Hapur është në zbatim të Procesit të Berlinit, iniciativë të cilën e themeloi kancelaria gjermane në largim, Angela Merkel që shtetet e Ballkanit Perëndimor të bëhen anëtare të BE-së.
“Nuk varet nga ne të bindim dikë që “Open Balkan” është i hapur. Duhet të ecim përpara, nuk mund të presim. Varet nga gjithkush që të marrë vendimet e veta. Ne thjeshtë po zbatojmë procesin e Berlinit. Gjithkush të vendosë në mënyrë të pavarur çfarëdo për vendin e vet”, tha Rama, ndërsa theksoi edhe njëherë se “Open Balkan” do të ecë përpara dhe një ditë do ta përshëndesin edhe ata që e kundërshtojnë sot.
Discussion about this post