Zyrtarët britanikë e francezë fajësuan njëri-tjetrin të mërkurën, pasi 27 emigrantë vdiqën, kur barka e tyre u fundos, ndërsa po mundoheshin të kalonin në Kanalin Anglez.
Ky rast është fatkeqësia më e madhe që është regjistruar ndonjëherë me emigrantë që kalojnë në Kanalin Anglez, shkruan Reuters.
Ky kalim, është njëra ndër linjat më të ngarkuara të lundrimit në botë. Trafikuesit zakonisht i mbingarkojnë gomonet me njerëz, duke i lënë mbi ujë dhe në mëshirë të valëve, ndërsa emigrantët mundohen të arrijnë bregdetin britanik.
Kryeministri britanik, Boris Johnson, tha se është i tmerruar dhe i bëri thirrje Francës që të bëjë më shumë për t’ua pamundësuar njerëzve përpjekjet për të kaluar kanalin ujor.
Në anën tjetër, presidenti francez, Emmanuel Macron, tha se Britania duhet të ndalojë së politizuari problemin për përfitime të brendshme, ndërsa ministri francez i Punëve të Brendshme, Gerald Darmanin, tha se Britania duhet të jetë pjesë e zgjidhjes.
Franca fillimisht raportoi për 31 të vdekur, por më pas shifra e vërtetë u deklarua në 27. Ministri Darmanin tha se dy emigrantë ndodhen në gjendje kritike në spital me hipotermi të rëndë.
Discussion about this post