Më shumë se 17 mijë ushtarë ukrainas janë trajnuar në një vit sipas një programi të udhëhequr nga Britania si pjesë e mbështetjes së saj për Kievin pas pushtimit rus, njoftoi sot Ministria Britanike e Mbrojtjes.
Programi, që synonte rekrutët e rinj me pak ose aspak përvojë ushtarake, konsistonte në të paktën pesë javë trajnim në trajtimin e armëve, ndihmën e parë, ligjin e luftës dhe taktikat e patrullimit.
Programi i trajnimit përfshin Britaninë, si dhe forcat e armatosura të nëntë vendeve të tjera: Kanadasë, Australisë, Zelandës së Re, Norvegjisë, Finlandës, Suedisë, Danimarkës, Lituanisë dhe Holandës.
“Vendosmëria dhe qëndrueshmëria e rekrutëve ukrainas që mbërrijnë në tokën britanike për t’u stërvitur përkrah forcave britanike dhe ndërkombëtare është përulëse ,” tha Sekretari britanik i Mbrojtjes Ben Wallace.
“Britania dhe partnerët e saj do të vazhdojnë të ofrojnë mbështetje jetike, duke ndihmuar Ukrainën të mbrohet kundër agresionit rus, për aq kohë sa të jetë e nevojshme”, shtoi ai.
Britania, e cila ka mbështetur Ukrainën që nga fillimi i luftës, fillimisht kishte propozuar trajnimin e 10,000 ushtarëve në një bazë ushtarake britanike.
Programi është zgjeruar dhe 30,000 rekrutë të rinj pritet të trajnohen deri në vitin 2024. Ministria britanike e Mbrojtjes tha se shërbimet e inteligjencës kishin identifikuar prova se programi, i quajtur Operacioni Interflex, po kontribuonte “në mënyrë të konsiderueshme” në efektivitetin e ushtrisë ukrainase.
Londra ishte gjithashtu vendi i parë që ofroi tanke të rënda për Kievin dhe ka mbrojtur dërgimin e avionëve luftarakë në Ukrainë.
Discussion about this post