Aferat e koncesioneve vazhdojnë të gërryejnë xhepat e qytetarëve shqiptarë. Në relacion e buxhetit faktit për vitin 2022, të publikuar nga Ministria e Financave, rezulton se në vitin e shkuar 108 milionë euro kanë shkruar për kontratat e PPP-ve. Këto para kanë shkuar për pagesën e 11 kontratave koncesionare, kur disa prej tyre po zvarritën prej vitesh.
“Për vitin 2022 janë 11 kontrata koncesionare/PPP me mbështetje buxhetore. Për të gjitha kontratat koncesionare/PPP me mbështetje buxhetore janë realizuar pagesa faktike. Fondet buxhetore të planifikuara për vitin 2022, sipas planit vjetor të ndryshuar, me destinacion mbështetjen nga buxheti për kontratat koncesionare/PPP, rezultojnë rreth 12.71 miliardë lekë. Pagesat faktike për vitin 2022, në total rezultuan në rreth 12.64 miliardë lekë ose 99.5% e planit vjetor 2022, të ndryshuar”, thuhet në relacionin e buxhetit.
Me këto fonde pasurohen oligarkët, ndërsa qytetarët nuk marrin shërbimin që meritojnë. Shumica e parave shkojnë për punë të pakryera e të papërfunduara.
Referuar tabelës së publikuar në raportin e buxhetit faktik shohim se janë 11 kontrata të cilat janë paguar me miliarda lekë vetëm përgjatë viti 2022. Kështu ka vazhduar pagesa e lartë për inceneratorët e Fierit dhe atë të Tiranës. Gjithashtu nuk mbeten pas koncesionet e infrastrukturës rrugore, ku ndër to përmendim kontratën për “Rrugën e Arbrit”.
Shpenzimet për Rrugën e Arbrit
“Përmirësimi, ndërtimi, operimi dhe mirëmbajtja e Rrugës së Arbrit”, është një koncesion që ka startuar fillimisht në vitin 2018, me lidhjen e kontratës koncesionare me afat 13 vite mes qeverisë dhe kompanisë private “Gjoka Konstruksion”. Ndërkohë, në 2019 nisën punimet me premtimin se do të përfundonin brenda vitit 2022. Por, ende e kësaj dite ARRSH vazhdon të japë para shpenzime ekstra për punimet e pambyllura.
Ndërkaq sipas të dhënave të Ministrisë së Financave për vitin 2022 janë paguar 2.9 miliardë lekë nga buxheti i shtetit për këtë koncesionar.
Kujtojmë këtu miliardat që janë derdhur edhe në dy vitet e shkuara. Konkretisht, që prej vitit 2019 kur është bërë pagesa e parë e deri në fund të vitit 2022, janë paguar për këtë rrugë nga taksat e qytetarëve dhe bizneseve shqiptare 10,5 miliardë lekë sipas të dhënave zyrtare të Ministrisë së Financave.
Pra, minimumi në çdo vit për këtë koncesionar jepen më shumë se 3 miliardë lekë. Jemi ende në katër vitet e parë, ndërsa janë përpara edhe 9 vite të tjera.
Kështu, deri në fund 2022, koncesionari i Rrugës së Arbrit rezulton të ketë marrë 13 miliardë lekë pagesa nga buxheti i shtetit, ose rreth 100 milionë euro. Kjo shumë është gati një e treta e fondeve totale prej 36,4 miliardë lekësh që do të marrë për të gjithë periudhën e koncesionit.
Është koha që ministrja Balluku, kreu i ARRSH, Evis Berberi dhe ministrja e Financave, Delina Ibrahimaj të japin llogari pse shpenzimet për këtë rrugë e tejkalojnë planin e kontratës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post