Policia ka ndëshkuar me 20 mijë lekë gjobë drejtuesin e një motori, i cili u filmua dukle kryer manovra të rrezikshme në autostradë, duke vënë në rrezik veten dhe përdoruesit e tjerë të rrugës.
Video e regjistruar është postuar në rrjetet sociale, ndërsa drejtuesi i mjetit shfaqet teksa heq duart nga timoni, dhe hipën mbi motor, duke e lënë atë që të ecë vetë.
“Si rezultat i veprimeve të menjëhershme procedurale, të kryera nga shërbimet e Policisë Rrugore të Lezhës, pas publikimit të një video-je në rrjete sociale, në të cilën shfaqet një drejtues motomjeti, duke kryer një manovër të rrezikshme për veten dhe për përdoruesit e tjerë të rrugës, në aksin rrugor “Fushë Milot – Thumanë”, u bë identifikimi i shtetasit D. Sh., 40 vjeç, banues në Tiranë, si dhe ndëshkimi i tij me masë administrative 20 000 lekë të rinj, për shkelje të pikave 2 dhe 3, të nenit 139 të Kodit Rrugor” – njofton Drejtoria Vendore e Policisë Lezhë.
Policia falënderon qytetarët për denoncimet dhe i fton ata që të vijojnë të denoncojnë çdo rast të paligjshmërive, në Komisariatin Dixhital apo në numrin pa pagesë 112″ – thotë komunikata.
Discussion about this post