Ish-zëdhënësi i stafit të fushatës së presidentit rus Vladimir Putin është emëruar drejtor i agjencisë shtetërore të lajmeve TASS, sipas një dekreti qeveritar të publikuar sot.
Kremlini ka forcuar kontrollin e tij mbi median që nga fillimi i luftës në Ukrainë, duke detyruar mbylljen e mediave kryesore të pavarura dhe duke i quajtur shumë gazetarë dhe botime si “agjentë të huaj”.
Kryeministri Mikhail Mishustin nënshkroi dekretin përkatës, sipas të cilit drejtori i përgjithshëm i TASS Sergej Mikhailov lirohet nga detyra dhe në vend të tij emërohet Andrey Kondrasov.
Mikhailov ishte drejtor i TASS që nga viti 2012. Sergej Mikhailov u lirua nga detyrat e drejtorit të përgjithshëm të TASS “me kërkesën e tij”. Mikhailov nuk tha pse e mori këtë vendim dhe çfarë synon të bëjë më pas.
Kondrasov, 50 vjeç, është gazetar dhe prezantues televiziv në televizionin shtetëror dhe në vitin 2018 ka punuar si sekretar shtypi për stafin e fushatës së Putinit. Kondrasov realizoi dokumentarët “Putin” dhe “Crimea, rruga për në Atdhe”.
Bashkimi Evropian dhe Kanadaja kishin vendosur sanksione ndaj Kondrasov, pas fillimit të pushtimit rus të Ukrainës.
TASS nisi punën në vitin e largët 1904 kur u themelua si Agjencia Telegrafike në Shën Petersburg dhe është agjencia e parë zyrtare e lajmeve e Rusisë. Më pas mori emrin e ri sovjetik, inicialet e të cilit nënkuptojnë në Agjencinë Telegrafike Ruse të Bashkimit Sovjetik (Agjencia Telegrafike e Bashkimit Sovjetik).
Discussion about this post