Tre vjet nga vrasja e Klodian Rashës, Policia pranon gabimin që përbalte viktimën

Policia ka pranuar për herë të parë zyrtarisht gabimin kur thanë se Klodian Rasha ishte i armatosur në momentin që u vra uniformat blu.

Zëdhënësi i Policisë së Shtetit, Gentian Mullai duke folur në emisionin ‘Neësroom’ ka pranuar për herë të parë se informacioni i dhënë se arma e gjetur në vendngjarje i përkiste Klodian Rashës, ishte i gabuar.

Mullai u shpreh se informacioni i dhënë, ishte bazuar në të dhënat e marra nga punonjësi i policisë që ka qenë në vendngjarje. Sipas Mullait, arma u gjet, por gabimi i Policisë së Shtetit ishte se pronësinë ia faturoi të ndjerit Rasha pa bërë verifikimet e nevojshme.

“Në lidhje me ngjarjen e rëndë ku humbi jetën Klodian Rasha, Policia e Shtetit ka dhënë 2 informacione. Informacionin paraprak në momentin që ka ndodhur ngjarja, 30 minuta më vonë, i mbledhur nga informacionet e para në vendngjarje si për çdo ngjarje tjetër.

Informacion i mbledhur nga punonjësit e Policisë në vendngjarje. Punonjësit e Policisë na kanë thënë që ka ndodhur ‘kështu, kështu’ dhe ne kemi dhënë njoftim. Disa orë më vonë gjatë kqyrjes së vendit të ngjarjes është gjetur një armë zjarri. Policia ka dhënë një njoftim se është gjetur një armë zjarri.

Të vetmin gabim që kemi bërë ne, është se arma i përkiste të ndjerit Klodian Rasha. Por ne e dhamë këtë informacion bazuar në informacionin paraprak që morëm nga punonjësi i Policisë,’- tha Mullai.

I riu Klodian Rasha u vra nga polici Nevaldo Hajdaraj mëngjesin e 8 dhjetorit 2020 pranë banesës së tij.

Policia e Shtetit tentoi të manipulojë ngjarjen fillimisht, por më pas e vërteta doli në dritë. Pas vrasjes së Rashës, pati protesta të mëdha, ndërsa dha dorëheqjen edhe ministri i Brendshëm i kohës, Sandër Lleshi.